રાજ્યમાં દક્ષિણ ગુજરાત અને સૌરાષ્ટ્રમાં કહેર મચાવ્યા બાદ સતત બીજા દિવસે વરસાદે વિરામ લીધો છે. સ્ટેટ ઈમરજન્સી ઓપરેશન સેન્ટર મુજબ આજે સવારે 6 કલાકે પૂરા થયેલા 24 કલાકમાં રાજ્યના માત્ર બે તાલુકામાં જ વરસાદ વરસ્યો છે. રાજ્યના જાણીતા હવામાન નિષ્ણાત અંબાલાલ પટેલની આગાહી મુજબ, જુલાઈ મહિનાા અંતિમ સપ્તાહથી રાજ્યમાં વરસાદનો નવો રાઉન્ડ શરૂ થશે.
17 જુલાઈ સુધી માહોલ યથાવત રહેવાની
અંબાલાલ પટેલની આગાહી મુજબ, 15 જુલાઈ સુધી રાજ્યના વિવિધ વિસ્તારોમાં હળવા વરસાદની સંભાવના છે. જ્યારે મધ્ય ગુજરાતના જિલ્લાઓમાં વરસાદી ઝાપટાં પડી શકે છે. રાજ્યના કેટલાક વિસ્તારમાં 17 જુલાઈ સુધી માહોલ યથાવત રહેવાની શક્યતા છે.
ક્યારથી શરૂ થશે વરસાદનો નવો રાઉન્ડ?
અંબાલાલની આગાહી પ્રમાણે, રાજ્યમાં 27 થી 30 જુલાઈ દરમિયાન વરસાદનો વધુ એક રાઉન્ડ સક્રિય થવાની સંભાવના છે. રાજ્યના ઘણા વિસ્તારોમાં સારો વરસાદ પડી શકે છે. આ ઉપરાંત ઑગસ્ટના પ્રથમ સપ્તાહમાં પણ સારો વરસાદ પડશે. જેના કારણે નદી, તળાવોમાં નવા નીર આવશે. તાપીના જળસ્તરમાં પણ વધારો થશે.
પરેશ ગોસ્વામીએ શું કરી છે આગાહી
જાણીતા હવામાન નિષ્ણાંત પરેશ ગોસ્વામીએ જણાવ્યું કે, વરસાદી સિસ્ટમ હવે ગુજરાત ઉપરથી ઉત્તર-પૂર્વની દિશામાં આગળ વધી ગઈ છે. જેના પગલે આજથી વરસાદ વિરામ લેશે. વરસાદના પ્રથમ રાઉન્ડમાં ગુજરાતમાં સાર્વત્રિક વરસાદ વરસ્યો છે. જો કે કચ્છ, દ્વારકા, જામનગર, મોરબી અને સુરેન્દ્રનગર જેવા જિલ્લાઓમાં હળવા વરસાદી ઝાપટાથી માંડીને માંડ એક ઈંચ સુધીનો જ વરસાદ પડ્યો છે. જેના કારણે ખેડૂતો વાવણી કરી શક્યા નથી. આથી આવા કેટલાક જિલ્લાઓમાં હજુ પણ વાવણી લાયક વરસાદની રાહ જોવાઈ રહી છે.
જો કે હજુ 15 જુલાઈ સુધી ભારે વરસાદની કોઈ શક્યતા નથી. આમ છતાં ભેજના કારણે કોઈ-કોઈ ભાગમાં હળવા વરસાદી ઝાપટા જરૂર પડી શકે છે. 15 જુલાઈ પછી 5 દિવસ સુધી વરસાદનો હળવો રાઉન્ડ જોવા મળી શકે છે. જે બાદ 25 થી 31 જુલાઈ દરમિયાન ગુજરાતમાં વધુ એકવાર સાર્વત્રિક અને ભારે વરસાદનો રાઉન્ડ આવી શકે છે. આ રાઉન્ડમાં જે જિલ્લાઓ બાકી રહી ગયા છે, ત્યાં પણ વરસાદ વરસી શકે છે.
હવામાન વિભાગે શું કરી છે આગાહી
હવામાન વિભાગના અનુમાન મુજબ ગુજરાતમાં 13 જુલાઈ સુધી મધ્યમથી હળવા વરસાદનું અનુમાન છે. નોંધનીય છે કે, જૂનના અંતિમ દિવસોથી રાજયમાં મોનસૂન એક્ટિવ થયા બાદ જુલાઈમાં રાજ્યના અનેક જિલ્લાને ચોમાસાએ આવરી લીધું છે. હવામાન વિભાગે આજે દક્ષિણ ગુજરાતમાં છૂટછવાયા મધ્યમથી હળવા વરસાદની આગાહી કરી છે. 13 જુલાઇ સુધી ગુજરાતના કેટલાક જિલ્લામાં છૂટછવાયો વરસાદ વરસી શકે છે. હવામાન વિભાગે 13 જુલાઈ બાદ વરસાદનું જોર ઘટવાની આગાહી કરી છે.
ગુજરાતના આ જિલ્લામાં નથી પડ્યો એક ટકા પણ વરસાદ
ઉલ્લેખનીય છે કે, રાજ્યમાં સિઝનનો સરેરાશ 25 ટકા વરસાદ વરસી ગયો હોવા છતાં એક જિલ્લો કોરોધાકોર છે. આ તાલુકામાં એક ટકા પણ વરસાદ નથી પડ્યો.સ્ટેટ ઈમરજન્સી ઓપરેશન સેન્ટર, ગાંધીનગરના આંકડા પ્રમાણે દેવભૂમિ દ્વારકા જિલ્લામાં એક ટકા પણ વરસાદ નથી પડ્યો. આ જિલ્લામાં સિઝનનો માત્ર 0.92 ટકા વરસાદ પડ્યો છે. કચ્છમાં 1.92 ટકા, બનાસકાંઠામાં 7.75 ટકા, જામનગરમાં 9 ટકા, મોરબીમાં 9.57 ટકા વરસાદ વરસ્યો છે.
