સુરત નેશનલ હાઈવે 48 પર સાવા બ્રિજ પાસે આજે એક હૃદયદ્રાવક ટ્રિપલ અકસ્માત સર્જાયો હતો. એક કન્ટેનર ડિવાઈડર કૂદીને રોંગ સાઈડમાં ઘૂસી જતાં સામેથી આવતા ટેલર અને લક્ઝરી બસ સાથે ધડાકાભેર અથડાયું હતું. આ ભયાનક અકસ્માતમાં ટેલર ચાલકનું કરૂણ મોત નીપજ્યું છે.
પ્રાપ્ત વિગતો અનુસાર, નેશનલ હાઈવે 48 પર સાવા બ્રિજ પરથી પસાર થયેલા એક કન્ટેનર ચાલકે સ્ટીયરિંગ પરથી કાબૂ ગુમાવતા કન્ટેનર ડિવાઈડર કૂદીને સામેના ટ્રેક પર આવી ગયું હતું. આ દરમિયાન સામેથી આવી રહેલા એક ટેલર સાથે તેની ટક્કર થઈ હતી. અકસ્માત એટલો ભયાનક હતો કે, ટેલરની પાછળ આવી રહેલી એક ખાનગી લક્ઝરી બસ પણ આ વાહનો સાથે અથડાઈ હતી.
આ ટ્રિપલ અકસ્માત એટલો ભયાનક હતો કે, ટેલરના કેબિનનો કચ્ચરઘાણ વળી ગયો હતો. કેબિનમાં ફસાયેલા ચાલકને ગંભીર ઈજાઓ પહોંચતા તેનું મોત નીપજ્યું હતું. બીજી તરફ, ખાનગી લક્ઝરી બસમાં સવાર મુસાફરોમાં પણ ચીસાચીસ મચી ગઈ હતી. કેટલાક મુસાફરોને પણ ઈજાઓ પહોંચી હતી, અકસ્માતમાં ઘાયલ થયેલા મુસાફરોને તાત્કાલિક 108 એમ્બ્યુલન્સ મારફતે નજીકની હોસ્પિટલમાં સારવાર અર્થે ખસેડવામાં આવ્યા હોવાનું જાણવા મળ્યું હતું.
હાઈવે પર વાહનોની લાંબી કતારો, પોલીસ કાફલો ઘટનાસ્થળે
અકસ્માતને પગલે હાઈવે પર ટ્રાફિક જામના દ્રશ્યો સર્જાયા હતા અને વાહનોની લાંબી કતારો લાગી ગઈ હતી. ઘટનાની જાણ થતાં જ સુરત જિલ્લા ટ્રાફિક પોલીસની ટીમ સ્થળ પર દોડી ગઈ હતી. પોલીસે તાત્કાલિક ક્રેન મંગાવી અકસ્માતગ્રસ્ત વાહનોને રોડ પરથી દૂર કરવાની કામગીરી હાથ ધરી હતી. લાંબી જહેમત બાદ વાહનવ્યવહાર પૂર્વવત કરવામાં આવ્યો હતો. પોલીસે આ મામલે વધુ તપાસ હાથ ધરી છે.
