નેપાળમાં આવેલા વિનાશક પૂરનો પ્રવાહ હવે બિહારના નદીકાંઠાના વિસ્તારો માટે નવી ચિંતાનું કારણ બન્યો છે. પૂરનાં પાણી સાથે અજાણી અને અસામાન્ય દેખાતી મોટી માછલીઓ બિહારના કેટલાક વિસ્તારોમાં જોવા મળતાં તંત્રએ લોકોને સાવચેત રહેવા જણાવ્યું છે. બિહાર સરકારે આવી માછલીઓને પકડવા, ખરીદવા, વેચવા કે ખાવાથી દૂર રહેવાની સ્પષ્ટ સલાહ આપી છે. અધિકારીઓનું કહેવું છે કે પૂરનાં પાણીમાં રહેલી માછલીઓ ગંદકી અને દૂષિત પદાર્થોના સંપર્કમાં આવી શકે છે, જેના કારણે આરોગ્ય માટે જોખમ ઊભું થઈ શકે છે.
બિહારના ડેરી, ફિશરીઝ અને એનિમલ રિસોર્સિસ વિભાગની ફિશરીઝ ડિવિઝને આ અંગે જાહેર એડવાઇઝરી બહાર પાડી છે. વિભાગે જણાવ્યું છે કે પૂર દરમિયાન તળાવો, નદીઓ, તળાવડીઓ અને અન્ય જળાશયોમાંથી માછલીઓ પૂરનાં પ્રવાહ સાથે દૂર સુધી પહોંચી શકે છે. આવી માછલીઓ ગંદા નાળા, મૃત પ્રાણીઓ અને અન્ય દૂષિત પદાર્થોના સંપર્કમાં આવવાથી બેક્ટેરિયા, વાયરસ અથવા અન્ય રોગકારક તત્વોથી દૂષિત થવાની શક્યતા રહે છે.
સરકારે લોકોને અજાણી અથવા અસામાન્ય દેખાતી માછલીનું સેવન ન કરવા અને પૂરનાં પાણીમાંથી પકડાયેલી માછલીની ખરીદી-વેચાણથી દૂર રહેવાની અપીલ કરી છે. સંબંધિત વિભાગની ઓળખ અને પુષ્ટિ વિના આવી માછલીને ખાવા યોગ્ય ન માનવા પણ જણાવાયું છે.
આવી માછલી ખાધા બાદ ઉલટી, ઝાડા, પેટમાં દુખાવો, ચક્કર, શ્વાસ લેવામાં તકલીફ અથવા અન્ય અસામાન્ય લક્ષણો જણાય તો તાત્કાલિક નજીકના આરોગ્ય કેન્દ્ર અથવા હોસ્પિટલમાં સારવાર લેવાની સલાહ આપવામાં આવી છે. માછલી અંગેની માહિતી મળે તો સ્થાનિક પ્રશાસન અથવા સંબંધિત જિલ્લા મત્સ્ય અધિકારીને જાણ કરવા પણ અપીલ કરાઈ છે.
દરમિયાન, 2 સપ્ટેમ્બર 2026ની સવાર સુધી નેપાળની સન કોશી, બુઢી ગંડકી અને મહાકાલી નદીઓનું જળસ્તર ચેતવણી સ્તરથી ઉપર નોંધાયું હતું. નેપાળના Department of Hydrology and Meteorologyએ નદીકાંઠાના અને નીચાણવાળા વિસ્તારોમાં રહેતા લોકોને સાવચેતી રાખવા તથા પાણીનું સ્તર વધે તો સલામત સ્થળે ખસવા તૈયાર રહેવાની અપીલ કરી છે.
