નવરાત્રીના માહોલ વચ્ચે અમદાવાદમાં ખેલૈયાઓની સુરક્ષાને લઈને ગંભીર સવાલો ઊભા થયા છે. શહેરના ન્યૂ સાયન્સ સિટી વિસ્તારમાં જાણીતા ગાયક જીગરદાન ગઢવીના ‘સાંચી ગરબા’ના આયોજનમાં ફાયર સેફ્ટીના નિયમોનું પાલન ન થયું હોવાના આક્ષેપો સામે આવ્યા છે. મળતી વિગતો અનુસાર, ફાયર વિભાગની સૂચનાઓ અને ચેતવણીઓ છતાં જરૂરી ફાયર NOC અને સત્તાવાર મંજૂરી વિના જ એસી ડોમમાં ગરબાનું આયોજન કરવામાં આવ્યું હોવાનો દાવો કરવામાં આવી રહ્યો છે.
આયોજન સ્થળે ખુલ્લા વીજ વાયરો અને આગ સામે રક્ષણ આપતાં જરૂરી સાધનોના અભાવની બાબતો પણ ચર્ચામાં આવી છે. જો આ આક્ષેપો સાચા સાબિત થાય, તો મોટી સંખ્યામાં ગરબા રમવા આવતા ખેલૈયાઓની સુરક્ષા સામે ગંભીર જોખમ ઊભું થઈ શકે છે. નવરાત્રી જેવા મોટા ઉત્સવમાં હજારો લોકો એકઠા થતા હોય ત્યારે ફાયર સેફ્ટીના નિયમોનું પાલન કરવું અત્યંત જરૂરી છે.
નોંધનીય છે કે, નવરાત્રી શરૂ થાય તે પહેલાં કીર્તિદાન ગઢવીના ગરબા માટે ઊભા કરવામાં આવેલા એસી ડોમ ધરાશાયી થવાની ઘટના પણ સામે આવી હતી. આવી ઘટનાઓ બાદ પણ જો સુરક્ષાના નિયમોનું યોગ્ય પાલન ન થતું હોય, તો તે ચિંતાનો વિષય છે.
હવે સવાલ એ ઊભો થાય છે કે ફાયર NOC અને જરૂરી સુરક્ષા વ્યવસ્થાઓ વિના આયોજન કરવાની મંજૂરી કોણે આપી? શું સંબંધિત તંત્ર દ્વારા સ્થળનું યોગ્ય નિરીક્ષણ કરવામાં આવ્યું હતું? જો કોઈ દુર્ઘટના સર્જાય, તો તેની જવાબદારી કોની રહેશે? ખેલૈયાઓની સુરક્ષા સુનિશ્ચિત કરવા માટે સંબંધિત વિભાગ અને આયોજકો દ્વારા તાત્કાલિક તપાસ અને જરૂરી કાર્યવાહી કરવામાં આવશે કે કેમ, તે જોવું રહ્યું.
