ગુજરાતના અનેક વિસ્તારોમાં ભારે વરસાદને કારણે ઉભી થયેલી પૂર જેવી સ્થિતિ વચ્ચે ભારતીય સેનાની Golden Katar Divisionને રાહત અને બચાવ કામગીરી માટે મેદાનમાં ઉતારવામાં આવી છે. વલસાડ, નવસારી તેમજ અમદાવાદ શહેર અને ગ્રામ્ય વિસ્તારોમાં સેનાની પૂર રાહત ટુકડીઓ તૈનાત કરવામાં આવી છે.
સેનાના જવાનો પૂરગ્રસ્ત વિસ્તારોમાં ફસાયેલા લોકોને સુરક્ષિત બહાર કાઢવા, જરૂરી સામગ્રી પહોંચાડવા અને સ્થાનિક તંત્રને રાહત કામગીરીમાં સહયોગ આપી રહ્યા છે. નવસારીના કેટલાક અસરગ્રસ્ત વિસ્તારોમાં પણ સેનાની ટીમો દ્વારા બચાવ કામગીરી હાથ ધરવામાં આવી છે.
Golden Katar Division ભારતીય સેનાની મહત્વપૂર્ણ ઇન્ફેન્ટ્રી ડિવિઝન છે, જેને સત્તાવાર રીતે 11મી ઇન્ફેન્ટ્રી ડિવિઝન તરીકે ઓળખવામાં આવે છે. તેનું મુખ્ય મથક અમદાવાદમાં આવેલું છે અને તે સેનાની Southern Command હેઠળ કાર્ય કરે છે.
રાજ્યમાં સતત વરસાદને કારણે દક્ષિણ ગુજરાતના કેટલાક જિલ્લાઓમાં પાણી ભરાવાની અને પૂર જેવી સ્થિતિ સર્જાઈ છે. વહીવટી તંત્ર દ્વારા ચાલી રહેલી રાહત અને બચાવ કામગીરીને વધુ મજબૂત બનાવવા માટે સેનાની મદદ લેવામાં આવી છે.
