રાજધાની દિલ્હીમાં CJP વિરોધ પ્રદર્શન દરમિયાન થયેલા હંગામા બાદ એક CCTV ફૂટેજ સામે આવ્યો છે, જેમાં કેટલાક લોકો પોલીસ અને રેપિડ એક્શન ફોર્સ (RAF)ના જવાનો પર પથ્થર અને કાચની બોટલો ફેંકતા જોવા મળી રહ્યા છે. દિલ્હી પોલીસે આ ફૂટેજની પુષ્ટિ કરી હોવાનું જણાવાયું છે.
પોલીસના જણાવ્યા અનુસાર, આ CCTV ફૂટેજ 20 જુલાઈના રોજ થયેલા વિરોધ પ્રદર્શન દરમિયાનનો છે. ફૂટેજમાં કેટલાક ઉપદ્રવી તત્વો રસ્તા પર પથ્થરમારો કરતા અને આસપાસની દુકાનો તથા પેટ્રોલ પંપને નિશાન બનાવતા દેખાઈ રહ્યા છે. કેટલાક લોકો કાચની બોટલો તોડી તેનો ઉપયોગ હુમલા માટે કરતા હોવાનો પણ દાવો કરવામાં આવ્યો છે.
CJPના જંતર-મંતર વિરોધ પ્રદર્શન દરમિયાન સ્થિતિ તંગ બની ગઈ હતી. પોલીસના જણાવ્યા પ્રમાણે, પ્રદર્શનકારીઓના એક જૂથે સુરક્ષા દળો તરફ પથ્થર અને બોટલો ફેંકી હતી, જેના કારણે કેટલાક પોલીસકર્મીઓ ઘાયલ થયા હતા. સ્થિતિ કાબૂમાં લેવા માટે પોલીસ અને RAFએ ભીડને વિખેરવા માટે કાર્યવાહી કરી હતી.
દિલ્હી પોલીસે હવે CCTV અને અન્ય વીડિયો ફૂટેજના આધારે હંગામામાં સામેલ લોકોની ઓળખ શરૂ કરી છે. અધિકારીઓનું કહેવું છે કે પુરાવાના આધારે જવાબદાર લોકો સામે કાયદેસરની કાર્યવાહી કરવામાં આવશે.
CJPનું આ પ્રદર્શન પરીક્ષા પેપર લીક મુદ્દે ચાલી રહેલા વિરોધનો ભાગ છે, જે દરમિયાન દિલ્હી પોલીસ અને પ્રદર્શનકારીઓ વચ્ચે અનેક વખત અથડામણની સ્થિતિ સર્જાઈ છે.
