અમેરિકા અને ઈરાન વચ્ચે ચાલી રહેલા સૈન્ય સંઘર્ષે વધુ ઉગ્ર સ્વરૂપ ધારણ કર્યું છે. અમેરિકી સેનાએ સતત 11મી રાતે ઈરાનના પાંચ શહેરો અને મહત્વના સૈન્ય ઠેકાણાઓ પર હવાઈ હુમલા કર્યા હોવાનું અમેરિકી સૈન્યએ જણાવ્યું છે. તાજેતરના હુમલાઓમાં ડ્રોન બેઝ, હથિયારોના ભંડાર, એર ડિફેન્સ સિસ્ટમ અને અન્ય વ્યૂહાત્મક લશ્કરી માળખાઓને નિશાન બનાવવામાં આવ્યા હોવાનું જણાવાયું છે.
મીડિયા અહેવાલો મુજબ, આ સંઘર્ષ ફેબ્રુઆરીથી શરૂ થયો ત્યારથી અમેરિકાએ અત્યાર સુધી અંદાજે 37.5 અબજ ડોલર (ભારતીય ચલણમાં અંદાજે 3 લાખ કરોડ રૂપિયાથી વધુ) ખર્ચી દીધા છે. આ ખર્ચમાં હવાઈ હુમલા, મિસાઇલ, સૈન્ય તૈનાતી, લોજિસ્ટિક્સ અને સુરક્ષા કામગીરીનો સમાવેશ થાય છે. અમેરિકાના સંરક્ષણ વિભાગે કોંગ્રેસ સમક્ષ વધારાના યુદ્ધ ભંડોળની પણ માંગણી કરી છે.
બીજી તરફ, ઈરાને પણ જવાબી કાર્યવાહી તેજ બનાવી છે. ઈરાન તરફથી બહેરિન, કુવૈત અને જોર્ડનમાં આવેલા અમેરિકી સૈન્ય ઠેકાણાઓને મિસાઇલ અને ડ્રોન દ્વારા નિશાન બનાવવાનો દાવો કરવામાં આવ્યો છે. આ વધતા તણાવને કારણે મધ્યપૂર્વમાં સુરક્ષા સ્થિતિ વધુ ગંભીર બની રહી છે અને વૈશ્વિક તેલ પુરવઠા પર પણ તેની અસર જોવા મળી રહી છે. હોર્મુઝની ખાડીમાં જહાજોની અવરજવર પર વધતા જોખમને કારણે આંતરરાષ્ટ્રીય બજારોમાં કાચા તેલના ભાવમાં અસ્થિરતા નોંધાઈ છે.
આંતરરાષ્ટ્રીય સ્તરે અનેક દેશોએ બંને પક્ષોને સંયમ રાખવાની અપીલ કરી છે. નિષ્ણાતોના મતે જો આ સંઘર્ષ લાંબો સમય ચાલશે તો તેની અસર માત્ર મધ્યપૂર્વ સુધી મર્યાદિત નહીં રહે, પરંતુ વૈશ્વિક અર્થતંત્ર, ઊર્જા બજાર અને આંતરરાષ્ટ્રીય સુરક્ષા પર પણ ગંભીર અસર પડી શકે છે.
