અમેરિકાની કેન્દ્રીય બેંક ફેડરલ રિઝર્વે પોતાની નાણાકીય નીતિને વધુ અસરકારક બનાવવા માટે ભારતીય મૂળના ત્રણ પ્રતિષ્ઠિત નિષ્ણાતોને મહત્વપૂર્ણ જવાબદારી સોંપી છે. ભારતીય રિઝર્વ બેંક (RBI)ના પૂર્વ ગવર્નર રઘુરામ રાજન, જાણીતા અર્થશાસ્ત્રી રાજ ચેટ્ટી અને માઇક્રોસોફ્ટની સિનિયર એક્ઝિક્યુટિવ આશા શર્માને વિવિધ ટાસ્ક ફોર્સમાં સામેલ કરવામાં આવ્યા છે. આ ટીમો ફેડની બેલેન્સ શીટ, આર્થિક ડેટા, રોજગાર, ઉત્પાદકતા અને મોંઘવારી સંબંધિત નીતિઓની સમીક્ષા કરશે, જેથી અમેરિકાની મોનેટરી પોલિસીને વધુ અસરકારક બનાવી શકાય.
ફેડરલના નવા ચેરમેન કેવિન વોર્શ દ્વારા રચાયેલી પાંચ ટાસ્ક ફોર્સમાં વિશ્વભરના અનેક જાણીતા નિષ્ણાતોને પણ સ્થાન મળ્યું છે. તેમાં બેંક ઓફ ઇંગ્લેન્ડના પૂર્વ ગવર્નર મર્વિન કિંગ, વોલમાર્ટના પૂર્વ CEO ડગ મેકમિલન, નોબેલ વિજેતા અર્થશાસ્ત્રી થોમસ સાર્જન્ટ અને વેન્ચર કેપિટલિસ્ટ માર્ક આન્ડ્રીસન જેવા દિગ્ગજોનો સમાવેશ થાય છે. વોર્શે જણાવ્યું કે વિવિધ ક્ષેત્રોના શ્રેષ્ઠ મગજોને સાથે લાવી ફેડરલના કાર્યમાં નવા વિચારો અને વધુ પારદર્શિતા લાવવાનો પ્રયાસ કરવામાં આવી રહ્યો છે.
રઘુરામ રાજનને બેલેન્સ શીટ પોલિસી ટાસ્ક ફોર્સમાં સામેલ કરવામાં આવ્યા છે, જ્યાં તેઓ હાર્વર્ડ યુનિવર્સિટીની અર્થશાસ્ત્રી કેરેન ડાયનન અને ફેડરલના પૂર્વ ગવર્નર જેરેમી સ્ટીન સાથે મળીને ફેડની બેલેન્સ શીટ, તેની અસર, ખર્ચ-લાભ અને મોનેટરી પોલિસીમાં તેની ભૂમિકાનું મૂલ્યાંકન કરશે.
રાજ ચેટ્ટીને ડેટા ટાસ્ક ફોર્સમાં મહત્વપૂર્ણ જવાબદારી સોંપવામાં આવી છે. તેઓ ડગ મેકમિલન અને યુનિવર્સિટી ઓફ શિકાગોના અર્થશાસ્ત્રી કેવિન મર્ફી સાથે મળીને એવા આર્થિક સૂચકોની ગુણવત્તા અને સમયસર ઉપલબ્ધતા સુધારવા પર કામ કરશે, જેના આધારે ફેડરલ મહત્વપૂર્ણ નીતિગત નિર્ણયો લે છે. માઇક્રોસોફ્ટની સિનિયર અધિકારી આશા શર્મા પણ એક મહત્વપૂર્ણ ટાસ્ક ફોર્સમાં જોડાયા છે અને તેઓ ટેક્નોલોજી તથા ડેટા આધારિત નીતિ પ્રક્રિયાને વધુ મજબૂત બનાવવામાં યોગદાન આપશે.
આ તમામ ટાસ્ક ફોર્સ ફેડની કોમ્યુનિકેશન વ્યૂહરચના, બેલેન્સ શીટ પોલિસી, આર્થિક ડેટાના ઉપયોગ, ઉત્પાદકતા અને રોજગાર તેમજ મોંઘવારી સંબંધિત નીતિ માળખાની સમીક્ષા કરશે. છેલ્લા કેટલાક વર્ષોથી અમેરિકા ઊંચી મોંઘવારીનો સામનો કરી રહ્યું છે અને ફેડરલ તેને લાંબા ગાળાના લક્ષ્ય સુધી લાવવા માટે પોતાની નીતિઓનું પુનર્મૂલ્યાંકન કરી રહ્યું છે.
કોરોના મહામારી દરમિયાન ફેડરલ રિઝર્વે પોતાની બેલેન્સ શીટને લગભગ 9 ટ્રિલિયન ડોલર સુધી વિસ્તારી હતી. ત્યારબાદ તેને ધીમે-ધીમે ઘટાડવાની પ્રક્રિયા ચાલી રહી છે. આવી સ્થિતિમાં આ સમીક્ષા અમેરિકાની ભવિષ્યની નાણાકીય નીતિ માટે મહત્વપૂર્ણ માનવામાં આવી રહી છે.
રઘુરામ રાજન વર્ષ 2013થી 2016 દરમિયાન RBIના ગવર્નર રહ્યા હતા અને તે પહેલાં આંતરરાષ્ટ્રીય નાણાં ભંડોળ (IMF)માં મુખ્ય અર્થશાસ્ત્રી તરીકે સેવા આપી ચૂક્યા છે. વૈશ્વિક અર્થતંત્ર અને નાણાકીય સ્થિરતા અંગે તેમની નિષ્ણાતીને આંતરરાષ્ટ્રીય સ્તરે વિશેષ માન્યતા મળી છે. અમેરિકાની ફેડરલ રિઝર્વ દ્વારા ભારતીય મૂળના ત્રણ નિષ્ણાતોને સોંપાયેલી આ જવાબદારી વૈશ્વિક આર્થિક ક્ષેત્રમાં તેમની વધતી પ્રતિષ્ઠાનો મહત્વપૂર્ણ પુરાવો માનવામાં આવી રહી છે.
