વેનેઝુએલામાં આવેલા શક્તિશાળી ભૂકંપ બાદ હવે જાપાનમાં પણ 6.9ની તીવ્રતાનો ભૂકંપ નોંધાયો છે. જોકે, સત્તાવાર માહિતી અનુસાર આ ભૂકંપ પછી સુનામીનો કોઈ ખતરો નથી અને અત્યાર સુધી કોઈ મોટા નુકસાન કે જાનહાનિના સમાચાર સામે આવ્યા નથી.
અમેરિકન ભૂસ્તર સર્વેક્ષણ સંસ્થા (USGS)ના જણાવ્યા મુજબ ભૂકંપનું કેન્દ્રબિંદુ કુજી શહેરથી આશરે 35 કિલોમીટર ઉત્તર-પૂર્વમાં હતું. ભૂકંપની ઊંડાઈ 51.7 કિલોમીટર નોંધાઈ હતી, જેના કારણે કેટલાક વિસ્તારોમાં જોરદાર આંચકા અનુભવાયા હતા.
ભૂકંપ બાદ વડાપ્રધાન સનાએ તાકાઈચીએ સંબંધિત અધિકારીઓને તાત્કાલિક સ્થિતિનું મૂલ્યાંકન કરવા તેમજ જરૂર પડે તો રાહત અને બચાવ કામગીરી શરૂ કરવા સૂચના આપી છે. સરકાર સમગ્ર સ્થિતિ પર સતત નજર રાખી રહી છે.
મુખ્ય કેબિનેટ સચિવ મિનોરુ કિહારાએ જણાવ્યું કે ભૂકંપ બાદ સુનામીની કોઈ શક્યતા નથી. તેમણે સ્પષ્ટ કર્યું કે અત્યાર સુધી કોઈ જાનહાનિ અથવા ગંભીર નુકસાનની માહિતી મળી નથી. ઉપરાંત દેશના પરમાણુ પ્લાન્ટોમાં પણ કોઈ પ્રકારની અસામાન્ય સ્થિતિ નોંધાઈ નથી.
સુનામીની ચેતવણી પાછી ખેંચાઈ
ભૂકંપ બાદ અમેરિકન સુનામી ચેતવણી કેન્દ્રે શરૂઆતમાં ભૂકંપના કેન્દ્રથી લગભગ 300 કિલોમીટરના દરિયાકાંઠાના વિસ્તારો માટે સુનામીની સંભાવનાને લઈને એલર્ટ જાહેર કર્યું હતું. સાથે જ પ્યુર્ટો રિકો અને વર્જિન આઇલેન્ડ્સ માટે પણ સાવચેતીરૂપ સૂચના આપવામાં આવી હતી.
જોકે, બાદમાં નવા ડેટાના વિશ્લેષણ અને પરિસ્થિતિની સમીક્ષા કર્યા પછી અમેરિકન સુનામી ચેતવણી કેન્દ્રે આ એલર્ટ પાછું ખેંચી લીધું હતું. એજન્સીએ જણાવ્યું કે હવે આ ભૂકંપના કારણે કોઈ પણ દરિયાકાંઠાના વિસ્તારમાં સુનામી આવવાની આશંકા નથી.
