બોલીવૂડના મહાનાયક અમિતાભ બચ્ચન ફરી એકવાર પોતાના સ્વાસ્થ્યને લઈને ચર્ચામાં આવ્યા છે. મંગળવારે રાત્રે તેમને હોસ્પિટલમાં દાખલ કરવામાં આવ્યા હોવાના અહેવાલો સામે આવ્યા હતા. જોકે બાદમાં જાણવા મળ્યું કે તેઓ માત્ર રૂટિન ચેકઅપ માટે હોસ્પિટલ પહોંચ્યા હતા. આ દરમિયાન અમિતાભ બચ્ચને સોશિયલ મીડિયા પર કરેલી એક પોસ્ટે ચાહકોની ચિંતા વધારી દીધી છે.
‘પિલોરી-બડુંબા’ પોસ્ટ બાદ અટકળો તેજ
20 મેની સવારે અમિતાભ બચ્ચને સોશિયલ મીડિયા પ્લેટફોર્મ X પર “પિલોરી – બડુંબા” લખીને પોસ્ટ કરી હતી. આ પોસ્ટ બાદ સોશિયલ મીડિયા યુઝર્સ અલગ અલગ અર્થ કાઢવા લાગ્યા હતા. ઘણા લોકોનું માનવું છે કે બિગ બી હેલિકોબેક્ટર પાયલોરી નામના બેક્ટેરિયલ ઈન્ફેક્શનથી પીડાઈ રહ્યા હોઈ શકે છે. આ પ્રકારના ઈન્ફેક્શનથી પેટના ઉપરના ભાગમાં દુખાવો અને અપચાની સમસ્યા સર્જાય છે. કેટલાક યુઝર્સે અનુમાન લગાવ્યું કે આ જ કારણસર તેમને હોસ્પિટલમાં દાખલ કરવામાં આવ્યા હશે.
T 5746 – पिलोरी – बड़ुंबा !!! ✏️
— Amitabh Bachchan (@SrBachchan) May 19, 2026
ચાહકોએ વ્યક્ત કરી ચિંતા
અમિતાભ બચ્ચનની પોસ્ટ બાદ ચાહકો સોશિયલ મીડિયા પર સતત પ્રતિક્રિયા આપી રહ્યા છે. કેટલાક લોકોએ હોસ્પિટલમાં દાખલ થવાના સમાચારને સાચા ગણાવ્યા હતા, જ્યારે કેટલાકે તેમના સ્વાસ્થ્ય અંગે ચિંતા વ્યક્ત કરી હતી. એક યુઝરે લખ્યું કે “આશા છે કે તમને પાયલોરીની સમસ્યા નહીં હોય”, તો અન્ય એક ચાહકે તેમને આરામ કરવાની સલાહ આપતા લખ્યું કે “તમે બીમાર છો તો હવે આરામ કરો”. ઘણા લોકોએ “સર, તમારી તબિયત ઠીક છે ને?” જેવા પ્રશ્નો પણ પૂછ્યા હતા.
ફિલ્મોના શૂટિંગમાં વ્યસ્ત છે બિગ બી
વર્કફ્રન્ટની વાત કરીએ તો 83 વર્ષીય અમિતાભ બચ્ચન હાલમાં કલ્કી 2898 એડીના સિક્વલના શૂટિંગમાં વ્યસ્ત છે. આ ઉપરાંત તેઓ ટૂંક સમયમાં કોર્ટરૂમ ડ્રામા ફિલ્મ “સેક્શન 84”માં પણ જોવા મળશે, જેનું નિર્દેશન રિભુ દાસગુપ્તા કરી રહ્યા છે. ગયા વર્ષે તેમણે લોકપ્રિય ટીવી શો કૌન બનેગા કરોડપતિની 17મી સીઝન પૂર્ણ કરી હતી.
