શહેરમાં કાયદો અને વ્યવસ્થાને મજબૂત બનાવતા વધુ એક નોંધપાત્ર સફળતા મળી છે. વરાછા પોલીસ સ્ટેશનની ટીમે 18 વર્ષ જૂના હત્યાના ગુનામાં ફરાર રહેલા ખૂંખાર આરોપીને ઝડપી પાડી પ્રશંસનીય કામગીરી કરી છે. મળતી માહિતી મુજબ, વર્ષ 2008માં વરાછા વિસ્તારમાં માત્ર 50 રૂપિયાની ઉઘરાણીના મામલે ‘બબલુ’ નામના વ્યક્તિની નિર્દયતાથી હત્યા કરવામાં આવી હતી.
આ ગંભીર ગુનામાં સંડોવાયેલો આરોપી રાજેશ ઉર્ફે રાકેશ રોશન ઘટના બાદથી જ પોલીસની પકડથી દૂર રહીને વર્ષો સુધી નાસતો ફરતો હતો. પોલીસે આરોપીને વોન્ટેડ જાહેર કરી તેની શોધખોળ શરૂ કરી હતી, છતાં લાંબા સમય સુધી તે હાથ લાગતો નહોતો.
આ કેસમાં મહત્વપૂર્ણ વળાંક ત્યારે આવ્યો જ્યારે વરાછા પોલીસને આરોપી અંગે ચોક્કસ બાતમી મળી કે તે ઝારખંડ રાજ્યના દુમકા જિલ્લાના જંગલ વિસ્તારમાં છુપાયો છે. માહિતીના આધારે પોલીસની વિશેષ ટીમ બનાવવામાં આવી અને ટીમે અત્યંત સાવચેતીપૂર્વક ઓપરેશન હાથ ધર્યું.
પોલીસ ટીમે સતત 7 દિવસ સુધી જંગલ વિસ્તારમાં અલગ અલગ જગ્યાએ વોચ રાખી. આરોપી પોતાને બચાવવા માટે આદિવાસીનો વેશ ધારણ કરીને જંગલમાં રહેતો હતો, જેથી તેની ઓળખ છુપાય. છતાં પોલીસની તીવ્ર નજર અને સુનિશ્ચિત આયોજનના કારણે અંતે આરોપીને ઝડપી પાડવામાં સફળતા મળી.
આ ઓપરેશન દરમિયાન પોલીસને જંગલ વિસ્તારની કઠિન પરિસ્થિતિઓનો સામનો કરવો પડ્યો હતો, છતાં ટીમે હિંમત અને ધીરજ રાખીને આરોપીને પકડી પાડ્યો છે. પોલીસે આરોપી સામે સી.આર.પી.સી. કલમ 70 મુજબના વોરંટ હેઠળ કાર્યવાહી હાથ ધરી છે અને હવે આગળની કાયદેસરની પ્રક્રિયા શરૂ કરવામાં આવી છે.
