ગેસની અછત વચ્ચે એક આશ્ચર્યજનક સમાચાર મળ્યા છે. ઇન્ડક્શનની ડિમાન્ડ વધવા લાગી છે. ડિમાન્ડ વધવાના પરિણામે ઓનલાઇન વેચાતા ઇન્ડક્શન આઉટ ઓફ સ્ટોક થઈ ગયા છે. ગેસ સિલિન્ડરના બુકિંગની અવધિ 25 દિવસ કરવામાં આવતા હવે લોકો ઇન્ડક્શનની ખરીદી કરી રહ્યા છે. બીજી બાજુ કૉમર્શિયલ સિલિન્ડર મળતા બંધ થઈ જતાં ધંધાદારીઓ પણ ઇન્ડક્શન તરફ વળ્યા છે.
આ કારણે જ ઇન્ડક્શનની ડિમાન્ડમાં 30 ટકાનો વધારો થયો છે. અને તેનો ફાયદો મેળવતા ઇન્ડક્શનના ભાવમાં પણ 15 ટકાનો વધારો જોવા મળી રહ્યો છે.
ઇઝરાયલ અને અમેરિકાએ સંયુક્ત રીતે ઈરાન પર હુમલો કરતા હવે એ યુદ્ધની મંથર ગતિએ અસર જોવા મળી રહી છે. આ અસર બીજે ક્યાંય નહીં પરંતુ ગુજરાતીઓના રસોડા પર દેખાય છે. ગઈકાલથી લોકોને ગેસ સિલિન્ડરની અછત પડી રહી છે. લોકો બુક કરી રહ્યા છે, પણ બુક થઈ નથી રહ્યો. રેડ એલર્ટના જોખમ વચ્ચે તડકામાં લોકો લાઇન લગાવી ઊભા છે. હોટલ ઉદ્યોગથી લઈને રસોડા સુધી ગેસ સિલિન્ડરના પોકારો થઈ રહ્યા છે. બીજી બાજુ ગુજરાતના ઉદ્યોગો પણ ગેસની અછતને લઈ વલખા મારવા લાગ્યા છે. ત્યારે આજે ગુજરાતમાં ઠેકઠેકાણે ગેસને લઈ લાઇનો લાગી હતી.
અમદાવાદમાં પણ ગેસ સિલિન્ડરને લઈ લોકોની લાંબી લાઇનો લાગી હતી. અમદાવાદના સરખેજમાં ભારત ગેસ સિલિન્ડર લેવા માટે મુખ્ય ઓફિસની બહાર વહેલી સવારથી મોટી સંખ્યામાં લોકો ગેસ સિલિન્ડર લેવા માટે ઉમટ્યા હતા. સિલિન્ડર ઓનલાઇન નોંધાતા ન હોવાના કારણે લાંબી કરતા લાગી હતી. જોકે દરરોજ 10 વાગ્યે ખુલતી ઓફિસ 11.30 વાગ્યે ખુલી હતી.
વડોદરામાં પણ ગેસ સિલિન્ડર લેવા માટે લોકો પડાપડી કરવા લાગ્યા હતા. વડોદરાના વાઘોડિયા રોડ પર આવેલ શ્રી ગાયત્રી ગેસ એજન્સીમાં લાંબી લાઇનો લાગી હતી. આકરી ગરમીમાં ગેસ સિલિન્ડર લેવા માટે લોકો વહેલી સવારથી જ લાઇનમાં ઊભા હતા. કલેક્ટરે કહ્યું હતું કે ગેસનો પુરતો સ્ટોક છે આમ છતાં લોકોએ એ વાતને અવગણી એજન્સીએ પહોંચી ગયા હતા.
સુરતમાં એક કંઈક બીજી જ સમસ્યા છે. અહીં ગેસ સિલિન્ડરની અછતથી તો લોકો પરેશાન છે જ પરંતુ ઓનલાઇન બુકિંગ ન થતાં લોકો અટવાયા છે. આ કારણે બજારમાં હવે જેનો ક્યારેય કોઈ ભાવ નહોતું પૂછતું તે ઇલેક્ટ્રિક સગડીની ડિમાન્ડ આવી ગઈ છે. દુકાનદારો પણ ઇલેક્ટ્રિક સગડીના સ્ટોકમાં વધારો કરી રહ્યા છે.
