ઉત્તર પ્રદેશના વારાણસીના ચૌબેપુર પોલીસ સ્ટેશનમાં મહિલા ઉપ-નિરીક્ષક (PSI) દ્વારા મહિલા ફરિયાદીને થપ્પડ માર્યાનો વીડિયો સોશિયલ મીડિયા પર વાયરલ થયો છે. વીડિયોમાં મહિલા અધિકારી માત્ર 8 સેકન્ડમાં ફરિયાદીને સતત 5 થપ્પડ મારતી જોવા મળે છે.
માહિતી મુજબ, ગીતા દેવી નામની મહિલા પોતાના પતિ સાથે જોડાયેલા એક કેસ અંગે ફરિયાદ લઈને પોલીસ સ્ટેશન પહોંચી હતી. પૂછપરછ દરમિયાન મહિલા PSI સાથે તેમની બોલાચાલી થઈ હતી, જે બાદ મામલો ઉગ્ર બનતા મહિલા અધિકારીએ ફરિયાદીને થપ્પડ મારી હતી. ઘટનાસ્થળે હાજર રહેલા અન્ય પોલીસકર્મીઓએ વચ્ચે પડી મામલો શાંત પાડ્યો હતો.
આ સમગ્ર ઘટનાનો વીડિયો પોલીસ સ્ટેશનમાં હાજર કોઈ વ્યક્તિએ બનાવી સોશિયલ મીડિયા પર વાયરલ કર્યો હતો. વીડિયો સામે આવ્યા બાદ પોલીસની કામગીરી પર સવાલો ઊઠ્યા છે.
બીજી તરફ, પોલીસે જણાવ્યું છે કે ફરિયાદી મહિલાએ લેખિતમાં જણાવ્યું છે કે તેમની પણ ભૂલ હતી અને તેઓ મહિલા PSI સામે કાર્યવાહી ઇચ્છતી નથી.
એસીપી વિનય દ્વિવેદીએ જણાવ્યું કે વાયરલ વીડિયો ગુરુવારનો હોવાનું પ્રાથમિક રીતે સામે આવ્યું છે. સમગ્ર મામલે વીડિયોની સત્યતા અને ઘટનાની તપાસ શરૂ કરવામાં આવી છે. તપાસમાં જે હકીકતો સામે આવશે તેના આધારે આગળની કાર્યવાહી કરવામાં આવશે.
